ابتدي باسم الإله الفرد ما غيره رجينا =خالق الأرض وسموات وكواكب مستديره
فالق الاصباح عالم سر ما تصنع يدينا = بيده المحيا وبيده موتنا يا اهل البصيره
اكتب الأبيات عن قصة أبونا من بدينا = قصة الخلق العظيم بيد مالكنا النظيره
قصة الانسان آدم في خلاقه يوم جينا = من لزاب الطين صنعة خالق الكون ومديره
قال ربي في كتابه قول موثوق ويقينا = إنني في الأرض جاعل من يخليها عميره
قالوا اللي من يمينه تخلق اللي من يشينا = بالفساد وزود سفك الدم في الأرض الطهيره
قال انا عالم بعلم الغيب وما تصنع يدينا = صنعتي إنسان شره ما يوازي كثر خيره
أرسل الله من خلاق النور للأرض ابتدينا = من خلاف ألوانها هاتوا لصنعتنا الكبيره
من بياض اللون ومن أسود ومن أحمر بغينا = حكمة المولى تعالى في تصانيف البشيره
استعاذت أرض ربي من منال المرسلينا = ما رضت نقص التراب الخوف يلحقها ضريره
جابها مالك مصير الموت بامر الله يجينا= من سهلها من صعبها من خبيث ومن عطيره
لزّب الطين وعطاها خالقه والعالمينا =وابتدى مشروع ربي مالك الملك وخبيره
من حمأ مسنون مصقول وثابت لا يلينا= صنعة الخالق ولا في الكون من يده قديره
ظل مصنوعه جسد من طين مدة أربعينا= بالسنه كنه كما الفخار لاصلصل فخيره
ربي سواه بسواته واعتدال الله يبينا= صوّره باحسنها صوره ركبه باللي يخيره
ثم جا حزّت حياته يوم حانت أن تحينا= نفخت الروح العظيمه روح علاّم السريره
ابتدت في علو راسه من بعدها عاطسينا= ثم قال الحمد لله حامد الرب ونصيره
ثم دبت في عيونه أبصر اللي ما رأينا= من ثمار الجنه اللي نطلب الله الظفيره
ثم دبت خالي جوفه واشتهاها آكلينا= عجل وما يدري أن الروح ما وصلت أخيره
اكتمل خلقه في آخر ساعة الجمعه قضينا= صار من دم ولحم وشحوم واشياءٍ كثيره
ثم سلّم بالسلام اللي يخص المسلمينا= رده الواجب وجاه الرد وقال الله بصيره :
هي تحيتك وتحية ما ذريته قادمينا= قال ما ذريتي ؟ آدم سأل ربه خبيره
قال يا آدم تخيّر ما أمامك من يدينا= قال يمناك ويدينك كلها يمنى قديره
ثم بسط كفه وشاف اللي يجي بعده بنينا= في بعضهم من ثغرهم نور من ربي ينيره
شاف واحد من عياله من ضوى نوره مبينا= قال منهو والعمر له كم كتب ربي نصيره
هذا داود ابنك الستين عمره كاتبينا= ما ارتضى آدم وشاف العمر بالمده قصيره
قال أنا بعطيه من عمري إلى الميّه سنينا= من عباد الله شهد بالقول وعين الله بصيره
علمه ربي أسامي ما خلق في الأولينا= ما عرفها اللي خلق قبله ولا سماها غيره
وحملّه ربي أمانه شالها درعًا حصينا= ما رضتها أرضْ وسمواتٍ ولا جبالٍ عسيره
ثم أمرهم له ولا صارت لغيره ساجدينا= ميزة الإنسان من ربه وميزتها كبيره
كلهم له ساجدين لأمر ربي طائعينا= ما بدا منهم بذور الشك أو في الأمر حيره
ألا أبليس اللعين اللي بأعماله غوينا= قال ما اسجد له وانا مخلوق من نار سعيره
بشّره ربي جهنم من أهلها الساكنينا= قال أنظرني ليوم الكل يكتب له مصيره
قال منظورٍ إلى يوم الحساب العارفينا= يوم أجازيكم جنان الخلد أو نارٍ سعيره
ومن عوج ضلعه خلق حوّى تبادله الحنينا= هي لباس له وهو والحب يجمعهم بخيره
ابتدى آدم حياته مع وليفه راغدينا= في نعيم الجنه اللي من يد الخالق سخيره
من لذيذ الزاد أصنافٍ ومشرب هانئينا= في حمى ربي وظله في سعة فضله وخيره
ألا ذيك اللي نهاهم ربي عنها قاربينا= من ورقها لو كلوها النفس مهمومه حسيره
زلّهم أبليس عنها من بعدها خارجينا= من نعيم الجنه اللي راحت بغلطه كبيره
يطلبون الرب غفرانه وعفوه نادمينا= من كرم ربي تقبل توبة آدم مع عشيره
قال للأرض اهبطوا فيها جميعًا عاملينا= منكم اللي يهتدي بامري ومنكم من يغيره
وابتدى آدم حياة الأرض فيها عامرينا= عابدين الله ولا غيره في هالدنيا خشيره
ابتدى يزرع ويحصد ورزقه ربي بنينا= عاش وما كمل سنين الألف ناقصها قصيره
ارسل الله له ملاك الموت في الموعد لفينا= قال باقي لي من المده سنيني الأخيره
ذكّره باللي عطاها من عياله واهبينا= ما ذكرها ثم جحدها والشهاده تستنيره
من جحوده صرنا نجحد والشهاده تقتصينا= ومثله النسيان بعضه في سما النسيان خيره
اقبضوا روحه في يوم الجمعه الأمر انتهينا= مات آدم والخلايق من بعد موته كديره
غسلوه وكفنوه وبالأطايب حانطينا= ثم صلوا بالصلاة اللي على الميت حصيره
في قبر ملحود حطوه الثرى به دافنينا= للتراب اللي ظهر منه رجع هذا مصيره
هذي سنتنا في غسل الميت ودفنه مشينا= دربنا والكل ذايق حرَة الموت وغريره
والختام افضل صلاة لخاتم الأنباء فينا= عد ما هل الغمام وعد تهليل البريره

المشاركة الأصلية كتبت بواسطة ليالي نجد ما شاء الله تبارك الله أبو الفيصل .. الله يعطيك العافية شاعر مبدع .. وأذهلتنا بهالقصيدة أسمح لي أن أحتفظ بها

المشاركة الأصلية كتبت بواسطة مسافر رائع ابو الفيصل ودائما مبدع

المشاركة الأصلية كتبت بواسطة ولدالديره ماشاء الله يا ابو الفيصل والله ابداع تسلم عليه وصح لسانك لكن عقب هالقصيدة نبي منك قصايد تتحفنا بها قصيدة جزله وتسلسل ولا احلى تسلم يا الغالي .. بس نبي غيرها لازم

المشاركة الأصلية كتبت بواسطة رجاوي جميل جداً ابو فيصل .... الف شكر لك ولقلمك الرائع .. تحية عطرة